பொக்கிஷம்

பேரன்போடு நீ கொடுத்த
உன் இதயப் பெட்டியை
பேராவலோடு
பெற்றுக் கொண்டேன்.

தயாராயிருந்த
என் பட்டியலில் இருந்து
ஒவ்வொன்றாய்
நான் தேடத் தொடங்க
ஒன்றும் கிடைக்காத படபடப்பில்
உன் பெட்டியில் இருந்ததெல்லாம்
வீசியெறிந்து
மீண்டும் மீண்டும்
தேடித் தோற்று
உன் இதயம் ஒரு காலிப்பெட்டி
என்று கண்ணீர் விட்டேன்.

இறுதியில் -
இருள் சூழ்ந்த தனிமையில் -
நான் வீசியெறிந்ததெல்லாம்
என்னவென்று
ஒவ்வொன்றாய்
ஒவ்வொன்றாய்
காணக் காண
உன் இதயமெனும்
பொக்கிஷத்தை
கண்டு கொண்டேன்.