தடயமின்றி

எப்படியேனும் பொருள் சேர்

பங்குச்சந்தையில்
பணம் போட்டு பின் அலை

கள்ளம் பழகு
கவனமாய் மறை

நேர்த்தியாய் கை குலுக்கு
கேட்பவர் விரும்புவதை பேசு
இயல்பாக பொய் சொல்
முன்னே சிரி
பின்னே வீழ்த்து

பகட்டாய் இரு
எளியோர் மேல் ஏறு
உன் பலகீனத்தில்
கவனம் விழாமல்
திசை திருப்பு

பொதுவில் தெரியும் உன் பிம்பம்
பார்த்துப் பார்த்து செதுக்கு
மற்றதெல்லாம் பதுக்கு

பிழைக்கத் தெரிந்தவனாய்
நிறைவாக வாழ்ந்து முடி
எந்த இடத்திலும்
தடயமின்றி செத்து மடி

பேச்சு

மூன்று நாட்களாக
அடிக்கடி மூச்சுத்திணறல்

பனியிலும் வியர்த்துக் கொட்டி
ஒரே இறுக்கம்

மார்பில் ஓங்கி மிதித்து
கழுத்தைப் பிடித்தறுப்பது போல்
பரவும் வலி

என் தவறு தான்
பரணில் கிடந்த
பழைய நினைவுகளை
நான் தூசு தட்டியிருக்கக் கூடாது

நெஞ்சாற பேச வேண்டும் நண்ப
முடிந்தால் கொஞ்சம்
வந்து போ